Gráðunarkröfur í Shotokan Karate

Á síðunum sem fylgja hér, má sjá þær hæfniskröfur sem gerðar eru til nemanda fyrir hverja gráðu.  Þau atriði sem sett eru á listann eru til viðmiðunar en þær geta breyst eftir því hvaða Sensei stýrir gráðuninni.  Vert er að athuga, að það nemendur þurfa að vera klárir á öllum þeim tæknum, fléttum og kata sem þeir hafa farið áður í gegnum við fyrri gráðun. 

Þegar verið er að gráða börn, eru ekki gerðar alveg eins miklar kröfur varðandi þann fjölda tækna sem þau þurfa að sýna fyrir hverja gráðun.  Þau þurfa þó að hafa getu og burði til að sýna þær grunntæknir sem eru fyrir hverja gráðun. 

Gráðun í karate fer fram í þremur stigum:
KIHON: Undirstöðutækni
KUMITE: Bardagi
KATA: Undirstöðutæknir gerðar í ákveðinni röð alltaf eins.

KIHON:
Kihon eru grundvallaræfingar í Karate og innihalda þær ýmsar gerðir af tæknum s.s. kýlingum, höggum, vörnum og spörkum. Þessar tæknir eru ýmist æfðar einar sér eða þeim er blandað saman. Eftir því sem ofar dregur í gráðanakröfum verða þessar æfingar flóknari.

KUMITE:
Í Kumite æfa tveir aðilar á móti hvor öðrum þar sem annar aðilinn gerir árás en hinn ver og gerir gagnáras. Árásaraðilinn tilkynnir fyrirfram hvaða árás hann ætlar að framkvæma nema í frjálsum bardaga.  Fyrst til að byrja með er Kumite æft undir strangri tilsögn kennara og vel skipulögð. Þegar nemandinn hefur æft Kumite í ákveðinn tíma fær hann að hafa meira frjálsræði.  Til eru nokkrar tegundir af Kumite sem æfðar eru og framkvæmdar í gráðun:
-Gohon Kumite: Fimm skrefa árás.  Framkvæmt í gráðun fyrir 9-7.kyu.
-Kihon Ippon Kumite: Eins skrefa árás.  Framkvæmt í gráðun fyrir 6-4.kyu.
-Jiyu Ippon Kumite: Eins skrefa frjáls árás. Framkvæmt í gráðun fyrir 3-1.kyu.
-Jiyu Kumite: Frjáls bardagi.  Framkvæmt í gráðunum frá 1.kyu og uppúr.  

KATA:
Kata er hinn hefðbundni æfingamáti í Karate, sem og öðrum Japönskum bardagalistgreinum. Gegnum árhundruðin hafa hreyfingar verið fléttaðar í kerfi og þar með hefur þekking varðveist frá meistara til meistara. 
Kata er fyrirfram ákveðin niðurröðun á hinum fjórum grunnhreyfingum í Karate: Uke, Zuki, Uchi og Geri og er barist við (4 til 8) ímyndaðra andstæðinga. Einn kosturinn við Kata miðað við Kumite er að hver hreyfing er framkvæmd með fullum huga og styrk, en í Kumite verða Karateka að halda örlítið aftur af sér til að viðhalda öryggi  varðandi snertingu. Einnig er vandamál í Kumite að menn hafa tilhneigingu til að sérhæfa sig í fáum fléttum og æfa þær aðallega á annarri hlið (t.d. sparka erfið spörk með hægri fæti). En í Kata eru hreyfingarnar framkvæmdar með fullum huga og meiri fullkomnun á bæði vinstri og hægri hlið. Þar á meðal eru erfiðar hreyfingar sem ekki nýtast iðkandanum fyrr en hann hefur öðlast mun meiri kunnáttu.  Í Karate þjálfun er Kata m.a. góður máti að byggja upp grunntækni, hrynjandi og tímasetningu, styrk og sprengikraft (mikil hröðun í byrjun á hverrar hreyfingar). Kata byggir einnig upp mikilvæga þætti í Karate, svo sem viðmóti og innri ró, einbeitni, ásamt réttum bardagaanda. Kata er einnig afbragðs líkamsrækt til að styrkja allan líkamann en hver hreyfing ásamt stöðu endar með Kime (hámarks ,læsingu vöðva).  Kata byrjar og endar með hneigingu og er hún framkvæmd á sama stað í bæði skiptin. Þeir þættir sem eru hvað mikilvægastir í Kata eru:
· Líkamsbeiting (body dynamic)
· Kraftur, þ.á.m. almennur styrkur, sprengikraftur og Kime
· Tímasetning, hrynjandi, innlifun, jafnvægi og náttúrulegt flæði milli hreyfinga
· Fókus og nákvæmni
Með réttri líkamsbeitingu er átt við hámarks orkufærslu út úr tækni þannig að virkni hreyfingar verði sem mest. Algengustu gallar varðandi rétta líkamsbeitingu eru:
· Öxl er lyft upp á við
· Hæll lyftist á aftari fót
· Mjöðminni er ekki þrýst fram á við eða er ekki rétt beitt
· Þyngarpunkturinn (Tanden) er ranglega staðsettur
· Aftari fótur hefur ekki læsingu (Kime) í lok kýlingar (Zuki)